– “Mos u bëni (në çështjet e betimit) si ajo që e prish endjen e saj pasi e ka thurrur fort! Dhe mos i përdorni betimet tuaja për dredhi mes jush …” – Mos i thyeni premtimet, betimet dhe marrëveshjet, e të bini në gradën më të ulët! Mos u bëni si gruaja që end veshje të forta dhe të bukura dhe, pasi e përfundon punën, fillon dhe prish gjithçka që ka bërë.
Siç lodhet duke e thurur rrobën, ashtu lodhet për ta shthurur atë. Kështu ajo tregon vetëm mendjelehtësi ose marrëzi. I tillë është edhe ai që prish marrëveshjet dhe paktet. Ai është i padrejtë, injorant, mendjelehtë dhe i mangët në fenë, burrërinë, dinjitetin dhe personalitetin e tij.
– “… për shkak se një grup është më i madh (e më i pushtetshëm) se tjetri!” – Ky është qëndrim shumë i shëmtuar. Ju lidhni marrëveshje dhe i përforconi ato me betime të shumta. Por, nga ana tjetër, ju prisni dhe synoni çastet më të volitshme.
Nëse jeni të dobët e të pafuqishëm ndaj partnerit tjetër, ju e plotësoni paktin, por këtë e bëni jo se e madhëroni Zotin dhe respektoni marrëveshjet, por sepse jeni të dobët e të pafuqishëm ndaj tjetrit. Në të kundërt, nëse jeni të fuqishëm dhe ju intereson të prishni kontratën, ju e prishni atë, pa u shqetësuar aspak për betimet tuaja para Zotit.
Kjo do të thotë të shkosh pas dëshirave personale dhe t’u japësh përparësi atyre mbi atë që dëshiron Zoti. Ky është një cenim i rëndë i personalitetit e dinjitetit njerëzor dhe i virtyteve të larta. Dhe të mendosh që të gjitha këto bëhen vetëm e vetëm që të kini më shumë pushtet, forcë, partnerë dhe aleatë se të tjerët. Por dijeni mirë se kjo është veçse sprovë nga Zoti, me të cilën Ai teston besimin dhe burrërinë tuaj.
– “Allahu ju ka sprovuar me këtë …” – Allahu përcakton situata dhe shkaqe të ndryshme, për t’ju sprovuar dhe për të dalluar të sinqertin nga mashtruesi i ulët.
– “… dhe në ditën e gjykimit Ai do t’ju njoftojë për çdo gjë rreth së cilës kundërshtoheshit.” – Atëherë, Ai do të shpërblejë çdo njeri për veprat e mira dhe do t’i poshtërojë tradhtarët dhe bukëshkelësit.